Kaldbakur

Taka upp þráðinn

2010-06-20T23:48:00.001Z

Þá er að byrja að "blogga" eftir fjögurra ára hlé. Koma svo.
Kveðja Viðar.

"Lítillátur ljúfur og kátur"

2006-08-13T10:04:00.000Z

Komið þið sæl eftir langt sumarfrí frá skrifum, en nú skal slegið í.

Fyrirsögn þessa pistils er með vísan í stöku úr heilræðavísum séra Hallgríms Péturssonar sem hljóðar svo:

Lítillátur, ljúfur og kátur
leik þér ei úr máta.
Varastu spjátur, hæðni, hlátur
heimskir menn svo láta.

Mér datt í hug þessi staka, og þá sérstaklega fyrsta ljóðlínan, þegar fréttir bárust nýverið af niðurskurði ríkisstjórnarinnar á áætluðum samgönguframkvæmdum til varnar verðbólgu í landinu.
Strax barst mikið harmakvein vegna þessara aðgerða frá vesturlandi, vestfjörðum, norðurlandi og austurlandi - en frá Suðurlandi heyrðist hvorki hósti né stuna!!

Ástæðu þessarar þagnar held ég að leita megi djúpt í sálarkyrnu okkar Sunnlendinga og er sennilega komið inn í genin og er þar með orðið okkur í blóð borið.
Sumir vilja flokka þetta undir lítillæti eins og segir í erindinu hér að ofan, einhverskonar hógværð, en aðrir vilja kalla fyrirbærið þrælslund. Ekki ætla ég mér þá dul að dæma hvort þetta sé dyggð eða löstur en vil meina að stundum sé þessi "eiginleiki" okkur Sunnlendingum til trafala og þá ekki síst þegar kemur að því að við þurfum að olboga okkur að hinum sameiginlega sjóði allra landsmanna ríkissjóði.

Við Sunnlendingar erum nefnilega að bera skarðan hlut frá borði hvað varðar úthlutun fjár úr ríkissjóði og þá sérstaklega hvað fé til samgöngumála varðar. Þetta hefur marg oft komið fram í ítarlegri og faglega unninni úttekt samgöngunefndar SASS á útdeililingu fjár til samgöngumála á landsvísu. En þrátt fyrir að þetta hafi legið fyrir nú um nokkurt skeið þá hefur það einungis haft þau áhrif á þá sem afgreiða samgönguáætlun á Alþingi að Suðurlandi er ætlaður sífellt smærri sneið af kökunni og verður að teljast undarlegt að þingmenn kjördæmisins skuli láta það líðast.
Að öðru:
Það var mikið í fréttum í liðinni viku þegar Sjávarútvegsráðherranum varð það á að snúa Lunda úr hálsliðnum án þess að hafa til þess tilskilið leyfi.
Nú ætla ég ekki að fara að spá því að Einar K Guðfinnson verði næsti formaður Sjálfstæðisflokksins og því síður ætla ég að yrkja stöku um Lundadrápið hans en það rifjist upp fyrir mér að hafa lesið um sambærilegt atvik hjá háttsettum embættismanni sem síðar varð formaður flokks og enn síðar forsætisráðherra landsins.
Þetta var í árdaga íslenska lýðveldisins þegar Hermann Jónasson drap friðaða Æðarkollu þá starfandi lögreglustjóri í Reykjavík. Um þetta atvik var ort þegar Hermann var nokkru síðar kosinn formaður Framsóknarflokksins:

Íslands lítill ábate
ætla ég sé að lýðræðe.
Komin er glópska og hvinnska á fé
og kollubani í hásæte.

Kannski að Einar Kristinn verði einhverntíma formaður Sjallana hver veit?

Sæl að sinni, Viðar.

Slæmir hlutir gerast líka hægt!! Klámvæðingin læðist yfir okkur.

2006-06-04T20:35:00.000Z

Sæl nú.
Var að horfa á þátt á Stöð 2 þar sem fjallað var um brjóstastækkanir og fleiri lýta aðgerðir sem gerðar eru í miklu mæli nú orðið. Þarna er fyrst og fremst um að ræða konur sem eru fórnarlömb tísku og útlitsdýrkunar sem ríður húsum í sífellt auknu mæli í okkar úrkynjaða nútíma samfélagi. Þarna er einnig um að ræða hluta af þeirri klámvæðingu sem hefur hægt en örugglega verið að ná æ meiri tökum á hinum vestræna heimi og er Ísland þar alls ekki undanskilið nema síður væri og eru t.d.kynsvalls auglýsingar Flugleiða erlendis til merkis um það. Á mínum ungdómsárum þótti mjög djarft að vera í pínupilsum og láta glytta í nafla, en í dag má þakka fyrir að það sé pjatla fyrir geirvörtum og lífbeini á unglingsstúlkum. Slíkur klæðaburður, ef klæðaburð skal kalla, hefði fyrir fimmtíu árum aðeins tilheyrt vændi, þannig hefur þróunin orðið.

Þær aðgerðir sem sagt var frá í þættinum voru bæði óhugnalegar og hættulegar fyrir þá sem gangast undir þær eins og dæmin sanna. Og maður spyr sig hvar eru bremsurnar? Hvers vegna eru ekki til strangar siða og faglegar reglur um slíkar aðgerðir sem reisa skorður við hömlulausri fjölgun þeirra í því eina augnamiði að þjóna einhverri "ímynd" sem sprottin er af brengluðum og óheilbrigðum hugsunargangi.

Það verða allir að berjast gegn þessari þróun af alefli, nota hvert tækifæri, hverja predikun til að berja á þessum vágesti. Við heyrum oft sagt "að góðir hlutir gerist hægt"!! Rétt eins og allt það sem gerist rólega sé gott. Nú hefur klámvæðingin verið að ná æ meiri tökum á okkar samfélagi í langan tíma og mér finnst það EKKI gott og vil hvetja allt sómakært og rétthugsandi fólk til að rísa upp gegn þessari óværu og bjarga með því menningu okkar og þeim fjölmörgu einstaklingum sem eru og verða fórnarlömb þessa ósóma.
Það er ekki of seint að snúa af leið og það er mikil ábyrgð í því falin að láta þessa öfugþróun ganga yfir á þess að andæfa á nokkurn hátt.
Stöð 2 á þakkir fyrir að hefja þessa umræðu og nú er það okkar að henda orðið á lofti og snúast til varnar af fullum þunga. "Orð eru til alls fyrst" en athafnir verða að fylgja á eftir til að gefa orðunum styrk og merkingu.
Sæl að sinni Viðar.

Sömuleiðis Guðmundur.

2006-05-29T20:34:00.000Z

Sæl verið þið.
Jæja þá eru kosningarnar að baki, þeim geri ég skil síðar en fyrst ætla ég að taka kveðju Guðmundar Inga sem hann sendi mér í Sunnlenska 25 maí s.l. sem hét "Viðar féll á prófinu--aftur".
Mín kveðja ber yfirskriftina:

Guðmundur féll á prófinu- ALLTAF!!!!!!!!

Ástæða þess að ég sting niður penna nú er kveðja sem Guðmundur Ingi Gunnlaugsson sendi mér í síðasta tölublaði Sunnlenska og þakkar mér fyrir samstarfið á því tímabili sem hann hefur starfað sem sveitarstjóri og hreppsnefndarfulltrúi, fyrst í Rangárvallahreppi og nú síðast í Rangárþingi ytra. Ég þakka Guðmundi sömuleiðis fyrir gott samstarf á þessu tímabili og óska honum alls hins besta við það sem hann tekur sér fyrir hendur í framtíðinni. Í greininni gerir Guðmundur að umtalsefni samanburð á stöðu Rangárþings ytra og Rangárþings eystra sem ég birti í kosningabaráttunni, útfrá tölum beint úr ársreikningum sveitarfélaganna tveggja. Guðmundur gaf þessum samanburði falleinkunn og skil ég þann dóm ekki þar sem aðeins var verið að leggja á borðið staðreyndir. Hvort sem það var nú fyrir þennan dóm Guðmundar eða annað þá hef ég fallið á einu prófi til viðbótar síðan Guðmundur skrifaði sína grein, en það eru nýliðnar kosningar og gleðs Guðmundur eflaust yfir því, já og eflaust fleiri.
EN úr því að Guðmundur er svo örlátur að gerast prófdómari yfir mér persónulega, þá ætla ég að endurgjalda honum greiðann.
Próf Guðmundar er eftirfarandi:

Guðmundur hefði átt að sjá að þær tölur sem ég birti eru beint úr ársreikningum sveitarfélaganna. Það sá hann ekki og fellur á því prófi.
Guðmundur hefði ekki átta að leggja til að ég gerði frekar samanburð á eignastöðu sveitarfélaganna vegna þess að þar er samanburðurinn enn óhagstæðari fyrir Rangárþing ytra. Hann fellur líka á á því prófi.
Guðmundur hefur fengið mjög langan tíma til að sanna sig sem sveitarstjóri í Rangárvallahreppi og síðan Rangárþingi ytra. Ferillinn er þannig að Rangárvallahreppur var í hans stjórnartíð undir eftirliti félagsmálaráðuneytis vegna skulda og rekstrarvanda og fyrstu fjögur ár Rangárþings ytra eru eins og fram kom í þeim tölum sem ég birti úr ársreikningi sveitarfélagsins. Frammistaða Guðmundar sem sveitarstjóri er stóra prófið hans og það er ljóst að hann hefur fallið á því líka.

Það er því ljóst að við erum báðir fallnir á þeim prófum sem við höfum lagt hvor fyrir hinn. Það sem mig undraði við grein Guðmundar, sem skipaði 14. sæti D-lista, var að það var hann sem svaraði fyrir framboðið í kosningabaráttunni og það sama var uppi á teningnum á sameiginlegum framboðsfundi sem haldinn var. Hvað segir sú staðreynd?????

Ég vil að lokum þakka þeim fjölmörgu sem ég hef starfað með á mínum sveitarstjórnarferli fyrir gott samstarf og góð kynni. Íbúum þakka þakka ég góðan stuðning og sérstaklega þeim sem stutt hafa mig dyggilega á hverju sem hefur gengið. Nýkjörinni sveitarstjórn óska ég velfarnaðar í störfum sínum fyrir samfélagið okkar en tilkynni að Kaldbaksbóndinn mun fylgjast vel með.
Það gekk ekki sem skyldi hjá K-listanum í nýliðnum kosningum af ýmsum ástæðum sem margir þekkja. Það er bara eins og það er og ætla ég ekki að gera það að umtalsefni hér en segi bara að lokum; það gengur bara betur næst.
Kveðja, Viðar á Kaldbak.

Íhaldsúlfur í félagshyggjugæru

2006-05-24T19:59:00.000Z

Komið þið sæl.
Í gær var haldinn sameiginlegur framboðsfundur í íþróttahúsinu á Hellu.
Það sem mér fannst merkilegast við þann fund var framganga íhaldsins.
Þeir komu í pontu hver af öðrum og lýstu því yfir að þeir væru tilbúnir!!
Þetta var mest áberandi hjá þremur efstu mönnum listans og fannst mér ótrúlegt að heyra menn, sem hafa verið í meirihluta í heilt kjörtímabil með hendur djúpt í vösum, tala um að þeir væru tilbúnir. Svo svöruðu þeir engum fyrirspurnum sem fram komu og fannst mér það til skammar.
Annað sem ég las úr þeirra uppfærslu á fundinum var að þeir ætla að láta Gísla Stefánsson draga vagninn og fannst mér Búkollumyndin í dag undirstrika það.
Með málefnin í molum eftir hörmulega frammistöðu á kjörtímabilinu ætla þeir að keyra í gegn um kosningarnar á vinsældum Gísla sem er í fimmta sæti, þess mæta drengs.
Ég setti fram eftirfarandi samanburð á rekstri Rangárþingi ytra og eystra á fundinum til að bregða ljósi á frammistöðu íhaldsins á kjörtímabilinu:

Ég valdi þessa aðferð vegna þess að umhverfi þessara sveitarfélaga er nánast eins. Það sem helst er ólíkt er að Rangárþing eystra hefur framkvæmt mjög mikið á kjörtímabilinu en Rangárþing ytra mjög lítið eins og sést á tölum við liðinn fjárfestingarhreyfingar.
Rangárþing ytra þarf hins vegar að fara í miklar framkvæmdir á næstunni en Rangárþing eystra ekki.

Samanburður á rekstri Rangárþings ytra og Rangárþings eystra.
Helstu niðurstöður beint úr ársreikningum sveitarfélaganna fyrir árið 2005 í milljónum króna : (Allt tal um rauntölur er moðreykur sem íhaldið var á fundinum að reyna að koma í augu kjósenda því allar eftirfarandi tölur eru innan sama árs og þurfa því ekki að uppreiknast)

-------------------Rangárþing eystra ---Rangárþing ytra

Rekstrartekjur --------777,6----------------------740,3
Rekstrargjöld ---------657,7 ----------------------639,7
Rekstrarafgangur -----85,7 ------------------------63,1
Fjárfestingar ----------161,0 ------------------------28,7
Heildarskuldir --------641,8 -----------------------635,0

Skuldir pr./ íbúa -----383þús.---------------------435þús.
Íbúafjöldi -------------1672-------------------------1459

Eins og þið sjáið er þetta að fullu samanburðarhæft þar sem um tölurnar eru frá sama ári og og af sömu liðum í ársreikningunum.
Og hvað segja þessar tölur okkur?
Jú þær segja okkur eftirfarandi:

Að Rangárþing ytra hefur 20 milljónum minna í rekstrarafgang.
Að þrátt fyrir miklar fjárfestingar hjá Rangárþingi eystra þá eru skuldir nánast þær sömu hjá báðum.
Að skuldir á hvern íbúa eru verulega hærri í Rangárþingi ytra
Að þessar tölur útskýra hvers vegna það fjölgar miklu hraðar í Rangárþingi eystra en hjá okkur þrátt fyrir að þeir eru fjær Reykjavíkursvæðinu.

Þessi samanburður finnst mér að sýni með skýrum hætti að fjárhags stjórnun Rangárþing ytra er verulega verri en í Rangárþingi eystra og er í raun falleinkun fyrir meirihluta íhaldsins hér.

Það þarf að gera miklu miklu betur við stjórn Rangárþings ytra og við verðum að breyta til.

Við þurfum að taka hendur úr vösum og:

Stórefla grunnþjónustuna og skapa skilyrði til fólksfjölgunar.
Gera átak í umhverfis og skipulagmálum sem skapar atvinnu.
Vatnsveitu um allt sveitarfélagið það eru mannréttindi.
Koma hugmyndum um hestaakademíu í framkvæmd sem skapar okkur nýja framtíðarmöguleika

Tækifærin eru mörg og við verðum að nýta þau og það þýðir ekki að vera bara tilbúinn fyrir kosningar.

Látið ekki íhalds úlfinn blekkja ykkur þó hann sletti yfir sig sauðargærunni rétt fyrir kosningar og láti eins og hann viti ekki um fortíð sína hér síðustu fjögur ár.

Við eigum betra skilið og vil ég því skora á íbúa Rangárþings ytra að gefa nú íhaldinu frí og kjósa K.

Kveðja Viðar.

Er Krónubúðin kosningatrix???

2006-05-16T12:00:00.000Z

Sæl verið þið.
Á hreppsnefndarfundi sem haldinn var 28. mars sl. var samþykkt að sveitarfélagið festi kaup á húseiginni Suðurlandsvegur 1 á Hellu alls um 1400 fm á 3 hæðum.Samhliða var gerður leigusamningur við Kaupás hf. Um leigu á rúmlega 800 fm af húsnæðinu sem verði til 10 ára með uppsagnar- og endurskoðunarrétti að fimm árum liðnum að hálfu beggja aðila.Kaupin á húseigninni Suðulandsvegi 1 sem aðstöðu fyrir stjórnsýslu sveitarfélagsins ætla ég ekki að ræða hér að öðru leiti en því að ég get vel unað við þann gjörning ef ekki hefði fylgt áðurnefndur leigusamningur.

Í leigusamningnum við Kaupás hf eru ákvæði um að Kaupás skuli setja hér upp Krónuverslun þegar "miðrými" verður opnað.(miðrými er fyrirhuguð tengibygging milli Suðurlandsvegar1 og Verkalýðshúss sem byggð verður af Rangárþingi ytra og húsfélagi Verkalýðshúss. Hvenær þetta húsnæði verður tilbúið er ekki vitað)Þegar við undirskrift samnings mun húsaleiga Kaupáss hf lækka frá því sem nú er og þegar Krónubúð opnar mun húsaleiga falla niður í 2 ár og næstu þrjú ár þar á eftir verður leiguprósentan mjög lág. Eftir það mun leiguprósentan vera helmingur af því sem nú er út samningstímabilið alls 10 ár. Auk þessa kveður samningurinn á um að Kaupás hf hafi forleigu og forkaupsrétt á umræddu leiguhúsnæði og einnig að ef gera þarf breytingar á leigushúnæðinu í kjallara þá borgar Rangárþing ytra það.Hægt er að endurskoða samninginn eftir fimm ár frá undirritun hans. Þannig er innihald þessa leigusamningnings í stuttu máli.

Nú vil ég taka skýrt fram að ég er mjög hlynntur því að hér komi lágvöruverslun og hef talað fyrir því að slíkt sé lífnauðsyn fyrir svæðið.

En að sveitarfélagið greiði niður vöruverð hér til langframa með því að styrkja eitt einstakt fyrirtæki hlýtur að vera langt umfram þau mörk sem sveitarfélög geta leyft sér og er væntanlega fordæmisgefandi.
Hvað ef annar aðili skyldi banka á dyrnar og biðja um sömu fyrirgreiðslu?
Ákvæði um stórfellda eftirgjöf á leigu flokkast sem styrkur til einstaks fyrirtækis. (gæti í þessu tilfelli verið yfir tuttugu milljónir á samningstímabilinu)
Þá má spyrja hver sé að reka hér lágvöruverslun Kaupás hf. eða sveitarfélagið. Í raun munum við sjálf greiða niður vörurnar áður en við kaupum þær svo stórfelld er eftirgjöf á húsaleigu samkvæmt samningnum. .
Hvaða endaleysa er þetta?
Og auk þess hvernig ætlar sveitarfélagið að fylgjast með því að samningsaðinn standi við sitt, á að setja á fót verðlagseftirlit Rangárþings ytra? Getur þetta gengið upp? Svarið er auðvitað NEI—og það er væntanlega skýringin á því að Krónubúð opnar ekki strax við undirritun samnings eins og eðlilegt væri ef samningamenn Rangárþings ytra væru að standa sig.
Lágvörverslun sem er í raun niðurgreidd af sveitarfélaginu,niðurgreitt af OKKUR, verður ekki opnuð á Hellu, eða sjáið þið það fyrir ykkur, og liggur því ekki í augum uppi að Krónubúðin er ekkert annað en kosningatrix.
Og þó að hér komi Krónubúð einhvertíma á næsta kjörtímabili þá verður það með þeim hætti að við munum aðeins vera að flytja fé á milli vasa hjá okkur sjálfum, slík er meðgjöfin samkvæmt áðurnefndum samningi.

Ágætu íbúar Rangárþings ytra er ekki alveg ljóst að þetta er rándýrt kosningaloforð meirihlutans, sem hefur verið með öll flögg niðri heilt kjörtímabil en eru nú korter fyrir kosningar að setja upp þetta krónubúðar flagg á ykkar kostnað til að fleyta sér yfir kosningarnar.
K-listinn varar við svona leikfléttum og bendir á leið til að efla þjónustu á Hellu en þar duga engin töfrabrögð né trix.
(sjá næstu grein hér fyrir neðan)
Sæl að sinni Viðar.

Hella

2006-05-09T01:28:00.000Z

Sæl nú.
Meðan ég býð eftir að hún Blíða beri öðru lambi þá ætla ég að skrifa smá hugleiðingu.

Efling Hellu sem þjónustukjarna.

Fjarað hefur undan þjónustustigi á Hellu síðari ár og mikið hefur verið um það rætt hvernig bæta mætti úr. Ekkert hefur þó verið gert af hálfu sveitarfélagsins til að sporna þar við og virðist úrræðaleysið vera algert þar á bæ sem sannaðist best þegar þeim datt í hug nú fyrir skemmstu að sveitarfélagið keypti sér Krónubúð. En hvað er þá til ráða spyrð þú.
Fólksfjölgun er eina raunhæfa leiðin til að gera Hellu að fullburða þjónustukjarna fyrir íbúana á svæðinu og til þess höfum við mikla möguleika sem við verðum að nýta.

Það eru einkum þrjú atriði sem mestu skipta þegar fólk hugar að búsetu:
1. Grunnþjónusta sveitarfélagsins verður að vera góð. Það verða ávallt að vera næg dagvistaúrræði, góður grunnskóli og þessu til viðbótar er mikil nauðsyn að efla menntun á hærri stigum og öðrum sviðum. Þar horfum við t.d. fræðaseturs í tengslum við Landgræðsluna og uppbyggingar á fræðslu tengdri hestamennsku og hrossarækt, einnig stofnun framhaldsskóla.
2. Umhverfis og skipulagsmál er mjög mikilvægur hlekkur. Ávallt þarf að vera til boða nægt framboð af fjölbreyttum lóðum til íbúðabyggðar og atvinnurekstrar til að sem flestir finni eitthvað við sitt hæfi. Það þurfa að vera lóðir fyrir unga sem aldna, ríka sem fátæka, á Bjargsbyggð og Söndum. Einnig þarf að hvetja einstaklinga til að koma á fót margskonar byggðafyrirkomulagi svo sem smábýlahverfum, frístundabyggðum og fl. Hvað umhverfismál varðar er mikilvægt að nægt þjónusturými sé við þjóðveg nr.1 og að þar sé snyrtilegt og vel um gengið á allan hátt. Með öðrum orðum að andlit þorpsins sé fagurt og frítt. Einnig er mikilvægt að hafa í huga að mikil vitundavakning er varðandi umhvervisvæna sorphirðu sem einnig er ódýrari þegar upp er staðið. Fráveitu og vatnsveitumál þurfa að vera í góðu lagi og hitaveita er mikill ávinningur.
3. Atvinnan kemur með fólkinu ef fyrri tveir þættirnir eru í lagi. En mikilvægt er að sveitarfélagið stuðli einnig að atvinnuuppbyggingu með markvissum hætti. Þar er margt hægt að gera og miklir möguleikar fyrir hendi. Við höfum hér gróskumesta hrossaræktar og hestamennskuhérað landsins og því býr mikið tækifæri sem sveitarfélagiðá að hjálpa til við að nýta. Þar er uppbyggingin á Gaddstaðaflötum mikilvægust og mun ef vel tekst til skapa hér mikla atvinnu. Landgræðsla Ríkisins er staðsett hér og því fylgja möguleikar á að koma á fót fræðasetri sem mun skapa störf. Okkar stórbrotna náttúra er alltaf að skapa okkur fleiri og fleiri störf þar erum við rétt að sjá byrjunina. Frekari úrvinnsla og markaðsetning landbúnaðarafurða er vannýttur þáttur hjá okkur t.d hvað varðar heimavinnslu hjá bændum sem ég er sannfærður að á mikla framtíð fyrir sér. Framhaldsskóla verðum við að koma á fót, það mun skapa störf og halda unga fólkinu frekar og lengur á svæðinu. Svona má áfram telja tækifærin eru hér, það þarf bara að nýta þau.

Þannig getur og á sveitarfélag að vinna að íbúafjölgun með markvissum aðgerðum og jákvæðu frumkvæði þar sem það á við. Það er sú eina og einasta leið sem fær er til að halda uppi viðunandi þjónustustigi sem ásættanlegt er fyrir íbúana. Það er nefnilega þannig að þjónustan eltir markaðinn og markaðurinn er fólk. Ef við ekki tökum mark á þessum lögmálum en ætlum að fara þá leið að niðurgreiða sjálf til okkar vöruverðið þá erum við á villigötum. K-listinn sem hafnar því stefnuleysi sem einkennt hefur stjórn sveitarfélagsins síðasta kjörtímabil en býður ykkur uppá framtíðarsýn þar sem við nýtum tækifærin okkar í mannauði og gjöfulu landi en stöndum vörð um það sem við eigum dýrmætast af náttúru og menningu.
Góða nótt já eða góðan dag eftir því hvernig á það er litið.
Viðar.

Ársreikningur Rangárþings ytra 2005

2006-05-03T22:56:00.000Z

Sæl verið þið.
Var að koma af hreppnefndarfundi þar sem meðal annars var staðfestur ársreikningur sveitarfélagsins fyrir árið 2005.

Á líðandi kjörtímabili hefur hlutfall framkvæmda verið mjög lítið, sem ætti að þýða að ef fjárhagsstjórn sveitarfélagsins hefði verið í góðu lagi á þessu tímabili þá ætti að hafa gengið verulega á skuldir sveitarsjóðs. Sú er þó ekki raunin því þrátt fyrir þetta þá hafa skuldir á tímabilinu hækkað.
Vegna lítilla framkvæmda á kjörtímabilinu verður Rangárþing ytra að fara í ýmsar mjög brýnar og mjög fjárfrekar framkvæmdir á því kjörtímabili sem í hönd fer.
Af þeim má nefna þær sem stærstar eru svo sem, skóla og leikskólabyggingar á Laugalandi og á Hellu fyrir 200-300milljónir króna, stjórnsýsluhús fyrir um 150milljónir, fráveituframkvæmdir fyrir +100milljónir og fl.. Á þessari upptalningu sést að að það þarf að gera miklu betur í rekstri Rangárþings ytra en verið hefur á þessu kjörtímabili ef ekki á að fara illa varðandi skuldastöðu og framkvæmdagetu sveitarfélagsins.
Samkvæmt rekstrarniðurstöðu þess ársreiknings sem nú var til afgreiðslu er rekstrarniðurstaða sveitarsjóðs jákvæð um 12,4milljónir króna þegar tekið er tillit til sölu eigna. Svo lítill rekstrarafgangur dugir skammt til að standa straum af þeim bráðnauðsynlegu framkvæmdum sem að framundan eru.
Það er því þörf á að ná saman kröftum allra sem sitja í komandi sveitarstjórn til að koma skútunni á réttan kjöl. Til þess að svo megi verða þurfa kjósendur taka málin í sínar hendur þann 27. maí n.k og komu nýjum meirihluta til valda með K-listann í stafni.

Slóðin á fundargerð hreppsnefndar fundarins er> http://www.rangarthingytra.is/?incid=3&bt=8&comm=1&log=294
þar er ýmislegt forvitnilegt að sjá en bendi sérstaklega á lið nr.5 en um hann er svo bókað: "5. Heklusetrið ehf. Leirubakkka:
Lögð fram tillaga um styrk til Heklusetursins að Leirubakka til uppsetningar á Heklusýningu og fræðasetri og greinagerð með henni.

Lagt er til að Heklusetrinu verði veittur styrkur að upphæð kr. 4.500.000 samtals sem greiðist á þremur árum. Á árinu 2006 greiðast kr. 2.500.000 og kr. 1.000.000 hvort árið 2007 og 2008.

Samþykkt með 5 atkvæðum, 3 á móti (HH. VHS. ÞS), 1 situr hjá (GÞ).

Bókun:
Uppbygging Hekluseturs er mjög gott framtak og góðra gjalda vert og eiga rekstraraðilar hrós skilið fyrir verkefnið. Ég hefði viljað sjá verkefnið fara sömu umsóknarleið og krafist er af öðrum fyrirtækjum sem sækja um styrki úr sjóðum sveitarfélagsins. Þá með því að skila inn tekju- og rekstraráætlun, sem hefur tíðkast. Fram kom að það var ekki gert í þessu tilfelli. Ég kýs því að sitja hjá við afgreiðslu málsins.

Guðfinna Þorvaldsdóttir, B-lista.

Bókun:
Vegna afgreiðslu 5. liðar á dagskrá varðar tillögu frá meirihluta sveitarstjórnar um styrkveitingu til Heklusetursins á Leirubakka.
Undirritaðir hafa eftirfarandi við framlagða tillögu að athuga:
· Tillagan fylgdi ekki fundargögnum.
· Ekki fylgdi með umsókn frá styrkþega.
· Ekki fylgdi með kostnaðar- og rekstraráætlanir frá styrkþega.
· Ekki er upplýst hvaða eignir Heklusetrið ehf. á.
· Upphæð styrks kr. 4.500.000 er úr takti við það sem tíðkast hefur við úthlutun styrkja úr
Atvinnueflingarsjóði og því varasamt frá jafnræðissjónarmiði.
Þröstur Sigurðsson, Heimir Hafsteinsson, Viðar H. Steinarsson."

Upphæð þessa styrks er úr öllum takti við það sem áður hefur tíðkast með styrki til einstaklinga og einkaaðila.
Það mætti halda að Rangárþing ytra sé ríkt sveitarfélag miðað við þennan rausnarlega styrk, en því miður er ekki svo og það verður erfitt fyrir komandi sveitarstjórn að fylgja þessu fordæmi.
Sæl að sinni,Viðar.

Framboðslistinn klár

2006-04-28T00:05:00.000Z

Sæl nú.
Í kvöld var haldinn fundur um framboðsmál í Brennu þar sem ákveðið var að bjóða fram lista í komandi sveitarstjórnakosningum.
Mikill hugur var í fólki og er markið sett á að ná inn þremur mönnum í sveitarstjórn. Listinn verður formlega kynntur og samþykktur mánudaginn 1. maí n.k. í Brennu ásamt málefnaskrá listans. Meðfylgjandi mynd er af þeim sem skipa fjögur efstu sæti framboðslistans. Í hvaða röð þetta fólk skipar listann gef ég ekki upp á þessari stundu til þess að halda ykkur forvitnum aðeins lengur.
Góða nótt, ykkar einlægur Viðar.
ES. Lítið inn á vef k-lista framboðsins, tengillinn er nýr hér til hliðar og þá sjáið þið hverjir skipa sex efstu sæti listans.

Erfðabreytt veröld

2006-04-21T00:27:00.000Z

Gott kvöld.
Var að vafra á Suðurland.is og sá þá þessahttp://www.sudurland.is/news.asp?View=Article&ID=2597 grein um ræktun á erfðabreyttu byggi sem samkvæmt því sem þar kemur fram er stunduð í Gunnarsholti. Lesið hana endilega.
Það sem ég spyr mig eftir lestur greinarinnar er eftirfarandi:

Af hverju eru heimamenn ekki spurðir hvort þeir vilji fá þessa ræktun í sitt umhverfi?
Hvar fer ræktunin fram?
Hver gaf leyfi fyrir hönd landumráðanda?
Samrýmist þessi ræktun þeim markmiðum sem sveitarfélagið og bændur á svæðinu hafa sett sér með >
gæðastýringu í sauðfjárrækt?
Staðardagskrá?
Green globe 21?

Fróðlegt væri að fá svör við þessum spurningum á málefnalegan og rökstuddan hátt.

Vaxandi áhyggjur hafa komið fram um að farið sé offari við að breyta erfðaþáttum lífvera og að þar ráði meira kapp en forsjá með ófyrirsjáanlegum afleiðingum.

Leyfi mér að birta hér smá tilvitnun í áðurnefnda grein:

"Hlutlægar upplýsingar hefur skort um þessi mál, því nær engin opinber umræða hefur farið fram og stjórnvöld virðast ekki hafa kynnt sér reynslu annarra þjóða af erfðabreyttri framleiðslu. Í Norður Ameríku hefur erfðabreytt ræktun mengað mjög út frá sér og auk þess leitt til aukinnar eiturefnanotkunar. Læknar hafa lýst áhyggjum af því að aukin tíðni ofnæmis kunni að tengjast neyslu erfðabreyttra matvæla. Heilsurannsóknir á dýrum benda til skaðsemi erfðabreyttra afurða, t.d. breytinga á líffærum og æxlismyndunar." Tilvitnun lýkur.

Í ljósi þess að uppi eru verulegar efasemdir um að tilraunir með að erfðabreytingar lífvera séu skaðlausar umhverfinu þá hlýtur að vera mjög varasamt að setja slíkt af stað í Íslenskri náttúru með ófyrirsjáanlegum afleiðingum.

Kynnið ykkur málið.

Góða nótt Viðar.

Gleðilegt sumar.

2006-04-20T14:45:00.000Z

Sæl verið þið og gleðilegt sumar og hafið þökk fyrir veturinn.
Sumardagurinn fyrsti er sérstakur dagur fyrir Íslendinga, kannski sá dagur ársins sem við fögnum mest. Dimmur veturinn að baki með sitt myrkur en framundan er vornóttin eilífa björt sem dagur. Þetta er tími vonar og rómantíkur, tími framkvæmda og bjartsýni sem er eins og inngróin í þjóðarsálina. Og það væri vel skiljanlegt að genin hefðu meðtekið umhverfið og aðstæðurnar í gegn um aldirnar til að aðlaga okkur og gera okkur fær um að lifa af í þessu fagra en harðbýla landi. Því þó að við, sem nú lifum, róum í velsæld ár og síð þá var það ekki svo fyrr á öldum. Oft á tíðum snérist baráttan um að lifa veturinn langa og stundum harða af. Og margar eigum við sögurnar af harðri lífsbaráttu þjóðarinnar þar sem margir urðu að láta í minni pokann fyrir náttúruöflunum. Fyrir það fólk sem þá lifði var sumarkoman því ekki bara von um betri tíð og bjarta daga heldur vonin um lífið sjálft fyrir sig og sína. Þetta er okkur hollt að hugleiða um leið og við sporðrennum enn einni brauðtertunni eða lambalærinu.
Sumarkveðja Viðar.

Stjórnsýsluhús og Krónubúð.

2006-04-08T11:37:00.000Z

Sæl nú.
Á hreppsnefndarfundi sem haldinn var 28. mars sl. var samþykkt eftirfarandi:
Beint úr fundargerð hreppsnefndar>
"4. Suðurlandsvegur 1 á Hellu - kaup og ráðstöfun:
Sveitarstjóri greindi frá stöðu mála og lagði fram tillögu að samkomulagi milli Rangárþings ytra og Kaupáss hf. um kaup á húseigninni Suðurlandsvegi 1, Hellu.

Gengið er út frá því að Kaupás hf. nýti forkaupsrétt vegna tilboðs í húseignina Suðurlandsveg 1 á Hellu og selji hana til Rangárþings ytra. Gerður verði leigusamningur um verslunarrými fyrir Kaupás hf. á milli fyrirtækisins og Rangárþings ytra sem verði til 10 ára með uppsagnar- og endurskoðunarrétti að fimm árum liðnum að hálfu aðila.

Samþykkt með 7 atkvæðum, 2 sitja hjá (HH. VHS.).

Bókun:
Bókun við lið nr. 4 í dagskrá fundarins. Varðar samning við Kaupás hf. um nýtingu forkaupsréttar á húseigninni Suðurlandsvegi 1 á Hellu og leigusamning milli Rangárþings ytra og Kaupáss hf. um leigu á verslunar- og geymslurými til allt að tíu ára, sem er óskilgreint að stærð. Undirritaður situr hjá við afgreiðslu málsins vegna þvingandi og fordæmisgefandi ákvæða í samningnum, sem eru vegna forkaupsréttar Kaupáss hf. á húseigninni Suðurlandsvegi 1 og varða skilyrði um langan leigutíma og lágar leigugreiðslur ásamt forleigu og forkaupsrétti. Undirritaður er hinsvegar samþykkur kaupum á húseigninni sem slíkri undir stjórnsýslu sveitarfélagsins og ákvæðum um að hér komi lágvöruverðsverslun.
Viðar H. Steinarsson."

Þannig er þetta bókað í fundargerð hreppsnefndar og ætla ég nú að fjalla um þennan gjörning í nokkrum orðum frá mínum bæjardyrum.
Kaupin á húseigninni Suðulandsvegi 1 er að mínu mati skynsamleg fjárfesting fyrir sveitarfélagið og hef ég bent á þennan möguleika oft áður sem vænlegan kost sem aðstöðu fyrir stjórnsýslu sveitarfélagsins. Þetta var hins vegar ekki athugað að hálfu hreppsyfirvalda fyrr en boð bárust frá KB banka fyrir skömmu um að ónafngreindur aðili hyggðist bjóða í Suðurlandsveg 1.
Þá fyrst var gert tilboð í húsið af Rangárþingi ytra en því var ekki tekið en tilboði hins ónafngreinda var hins vegar tekið. Var þá talið að úti væri um málið. Svo var hins vegar ekki því boð bárust frá Kaupási hf um hvort Rangárþing ytra vildi ganga inn í forkaupsrétt sem það fyrirtæki ætti í húseigninni Suðurlandsvegur 1. Þarna var um að ræða að ganga inn í tilboð áðurnefnds ónafngreinds aðila með Kaupás sem millilið og með fylgdi hugmynd að leigusamningi við Kaupás hf á miðhæð og kjallara Suðurlandsvegar 1 til tíu ára.
Þetta varð úr og kaupir sveitarfélagið húseignina á rúmar sjötíu milljónir með áföllnum kostnaði vegna þess að Kaupás er milli liður. Sá leigusamningur sem fylgir þessum kaupum við Kaupás hf er til tíu ára og hefur Kaupás mest allan kjallara og miðhæð hússins undir sína starfsemi á þeim tíma. Inni í þessum samningi eru ákvæði um að Kaupás skuli setja hér upp Krónuverslun þegar "miðrými" verður opnað.(miðrými er fyrirhuguð tengibygging milli Suðurlandsvegar1 og Verkalýðshúss sem byggð verður af Rangárþingi ytra og húsfélagi Verkalýðshúss. Hvenær þetta húsnæði verður tilbúið er ekki vitað)
Þegar við undirskrift samnings mun húsaleiga Kaupáss hf lækka frá því sem nú er og þegar Krónubúð opnar mun húsaleiga falla niður í 2 ár og næstu þrjú ár þar á eftir verður leiga mjög lág. Eftir það mun leiga vera helmingur af því sem nú er út samningstímabilið alls 10 ár.
Auk þessa kveður samningurinn á um að Kaupás hf hafi forleigu og forkaupsrétt á umræddu leiguhúsnæði og einnig að ef gera þarf breytingar á leigushúnæðinu í kjallara þá borgar Rangárþing ytra það.
Hægt er að endurskoða samninginn eftir fimm ár frá undirritun hans.

Þannig er þetta nú í pottinn búið bæði gott og vont og vil ég nú greina þar á milli.
Fyrst það góða:

Viðunandi húsnæði fyrir stjórnsýsluna á góðum stað.
Kaupverð ásættanlegt á húsinu í heild.
Hugmyndir um tengibyggingu.
Að fá Krónuverslun.

Þá það slæma:

Langur leigusamningur við Kaupás.
Krónuverslun kemur ekki strax við undirritun.
Niðurfelling og afsláttur af leigu er of mikill og til of langs tíma, nær í raun til alls leigutímabilsins þ.e. 10ára.
Ákvæði um stórfellda eftirgjöf á leigu flokkast sem styrkur til einstaks fyrirtækis og er þar með fordæmisgefandi. (gæti í þessu tilfelli verið á bilinu 2-4 milljónir króna á ári eða yfir tuttugu milljónir á samningstímabilinu)
Forkaups og forleiguréttur Kaupáss að mjög stórum hluta þeirrar húseignar sem keypt er.

Það sem mér finnst verst er að ekki skuli vera breytt í krónubúð nú þegar og síðan verður vandi hjá sveitarfélaginu að fylgjast með að Kaupás standi við ákvæði um Krónubúð þegar þar að kemur í svo langan samningstíma. (verðlagseftirlit Rangárþings ytra)

Svo er ein ágæt spurning sem athugull sveitungi kom með:

Hvað ef Bónus skyldi banka á dyrnar og biðja um sömu fyrirgreiðslu hjá Rangárþingi ytra EÐA ef Bónus mætti á Hvolsvöll upp á eigin reikning?????

Hvað þá!???

Góð spurning en svona er þetta í pottinn búið og nú getið þið sjálf vegið þetta og metið.

Er hér um að ræða meiriháttar ótvírætt og óumdeilt framfaramál eins og sigurvegari prófkjörs D-listans segir og ætlar að vinna kosningarnar með --EÐA er þessi samningur sýnd veiði en ekki gefin, veisla þar sem þú veist ekki hverjar veitingarnar verða eða hvað þær kosta.

Já vel á minnst hver er heildarkostnaðurinn við pakkann þegar upp er staðið?

Svarið er að sá kosningavíxill er óútfylltur.

En við segjum bara að þetta reddast og vonandi verður það svo.

Sæl að sinni Viðar.

Framsókn kynnir lista.

2006-04-06T22:26:00.000Z

Gott kvöld.
Í gærkvöldi tilkynntu Framsóknarmenn sinn framboðslista til sveitarstjórnar kosninganna í vor.
Fínn listi hjá þeim og óska ég þeim til hamingju með hann. Athygli vekur hve Framsókn er lífleg hér á þessu svæði þar sem flokkurinn virðist vera í mjög mikilli tilvistarkreppu á landsvísu. Þetta á sér þó þær sögulegu forsendur að Rangárþing hefur ætíð verið rótgróið og sterkt vígi Framsóknar og það merkilega er að sú vígstaða virðist vera nokkuð góð enn í dag þó flokkurinn sé við það að hverfa t.d. á höfuðborgarsvæðinu.
Ég tel að þessi listi hafi alla burði til að gera góða hluti í kosningunum því hann hefur gott mannval og kynjahlutföll eru með ágætum í efstu sætum. Ég hlakka til að fylgjast með hvernig listinn leggur upp sína málefnaskrá hvað varðar áherslur á hin ýmsu mál.
Ég vona að Framsókn gangi vel í sinni baráttu því það er mikilvægt til þess að hægt sé að koma íhaldinu frá völdum hér í vor og það er megin málið.
Við vitum það nefnilega öll að þegar eitthvert stjórnmálaafl hefur verið mjög lengi við völd, eins og íhaldið hefur verið hér um slóðir og er farið að líta á sveitarfélagið sem sitt einka fyrirtæki þá er voðinn vís. Það slævir þá sem í þannig stöðu eru á þann veg að þeim finnst sem aðhald lýðræðisins sé þeim víðs fjarri og afleiðingin verður sú að hvatinn til að gera betur þverr. Þess sér greinilega stað í okkar sveitarfélagi.
Gefum því íhaldinu frí, sveitarfélagið þarf á því að halda og þeir þurfa þess líka sjálfir til að vita hvernig lýðræði virkar.
Góða nótt, Viðar.

Endastöð fráveitu á Hellu

2006-04-06T08:45:00.000Z

Sæl nú.
Eitt mál hefur verið nokkuð í umræðu á vettvangi sveitarstjórnar undanfarið en það er staðsetning endastöðvar fráveitunnar á Hellu. Forstöðumaður umhverfissviðs og oddviti sveitarfélagsins fóru í leiðangur á síðasta ári til að skoða slík mannvirki á nokkrum stöðum á landinu bláa. Eftir þá ferð virðast þeir vera komnir með hugmynd sem þeir telja að gæti hentað fráveitunni á Hellu. Samkvæmt lýsingu þeirra félaga þá virðist þetta vera álitleg lausn sem slík.
Það sem mér líst ver á er sú staðsetning sem þeir félagar hafa nefnt fyrir slíkt mannvirki en það er hornið milli Árhúsa og Gaddstaðaflata. Ég tel að það sé stórvarasamt að setja endastöð fráveitunnar á Hellu svo nærri eða nánast inn í byggðinni. EKKERT er svo fullkomið í henni versu að það geti ekki bilað og með það í huga þá er þessi staðsetning algerlega óásættanleg.
Við búum það vel hér að við höfum nægt rými til að leysa þetta mál á miklu skinsamlegri máta og hugsað til framtíðar tel ég að við eigum að fara með endastöðina austur í Gaddstaðasíki og velja henni stað þar sem best þykir henta á því svæði.
Sæl að sinni, Viðar.

Ægissíðu slagsíðan og meirihlutinn klofinn.

2006-04-04T23:02:00.000Z

Sæl enn.
Það fór eins og mig grunaði að það yrði Ægissíðu slagsíða hjá íhaldinu.
Það hafði hins vegar ekki hvarflað að mér að "týndu sauðirnir" fengju svona móttökur. Hélt að það tilheyrði kristilegu hugarfari að fagna þegar slíkir ráfuðu heim í hjörðina á ný en ekki að setja þá í SLÁTURHÚSIÐ. Talandi um sláturhús þá hlýtur að vera glatt á hjalla þar eftir prófkjörið en vonandi verður sveitarfélaginu ekki stjórnað þaðan eftir kosningar.

Ég var hins vegar að koma af sveitarstjórnar fundi og þar urðu tíðindi!!!
Það sögulega gerðist að meirihlutinn klofnaði í afstöðu sinni til fjármögnunar á skólahúsnæði á Laugalandi. Það hafði áður verið ágreiningur milli meirihluta og minnihluta um hvor leiðin væri vælegri að gera leigusamning eða að sveitarfélagið fjármagnaði sjálft sem síðan endaði með því að meirihluti meirihlutans gekk í lið með minnihlutanum.
Til að komast að því hvað þar var á ferðinni þá er tengill beint inn á síðuna eftirfarandi og smellið á hann. http://www.rangarthingytra.is/?incid=3&bt=8&comm=1&log=290
Kveðja Viðar.

180 ára afmæli

2006-04-04T22:48:00.000Z

Sæl nú.
Verð að segja ykkur frá skemmtilegri afmælisveislu sem ég mætti til í gær.
Næfurholts tvíburarnir þau Geir og Jóna urðu 90 ára og tóku á móti gestum að hætti hússins. Það er ekki kvíðvænlegt að eldast ef maður verður jafn ern og þau systkyn eru til orðs og æðis. Geir er þó orðinn hægferðugur vegna bilunar í hnjám. Ég þakka fyrir að fá að kynnast fólki eins og þeim systkynum og óska þeim innilega til hamingju með áfangann. Og reyndar má segja til hamingju Ísland að eiga slíkt fólk.
Sæl að sinni Viðar.

Oddaverjar á lífi.

2006-03-31T20:24:00.000Z

Sælt veri fólkið.
Jæja þá er orðið ljóst að tillaga um að leggja Oddaverja niður var kolfelld á aðalfundi félagsins s.l.miðvikudagskvöld með samhljóða atkvæðum allra fundarmanna. Kom þetta ánægjulega á óvart því búist var við að þeir sem lögðu fram tillöguna myndu fylgja henni fast eftir.
Svo varð ekki og því eru Oddaverjar sprelllifandi sem aldrei fyrr og má kannski segja sem svo að úr því sem komið var þá hafi þessi útganga tveggja félaga verið heillaspor fyrir félagið og vonandi fyrir þá einnig.
Ljóst er nú að prófkjör D-listans var freisting sem var of stór fyrir þessa fyrrum félaga vora og vonandi gengur þeim vel á þeim vettvangi því annars má búast við að þeir leggji til að Sjálfstæðisflokkurinn verði lagður niður!!!!

Oddaverjar hafa á að skipa öflugum hópi fólks sem er tilbúinn í baráttu fyrir betra samfélagi hér í Rangárþingi ytra. Af nógu er að taka þegar málefnin eru annars vegar.
Það má gera betur á mörgum sviðum:

Fjárhagsstaðan er þröng þar þarf nýja hugsun.
Umhverfismál þarf að setja framar á forgangslista.
Efla Grunnskólana með bættri aðstöðu og enn meiri fagmennsku.
Stórauka þarf dagvistarrými með byggingu nýs leikskóla á Hellu ásamt auknum stuðningi við dagforeldra.
Nýta betur eignir sveitarfélagsins á Laugalandi og í Þykkvabæ bæði til að auka þjónustu og atvinnu.
Framhaldsskóla í sveitarfélagið.
Fræðasetur í Gunnarsholt.
Hesta akademíu á Gaddstaðaflatir.
Bjargsbyggð í framkvæmd.
Vatnsveitumál eru eitt af forgangmálunum.
Fráveitu framkvæmdum á Hellu þarf að ljúka með endastöð í Gaddstaðasíki.
Jafnréttisáætlun sveitarfélagsins þarf að gera virka.
Atvinnu og þjónustumálum þarf að sinna betur.
Skipulagsmál með heildarsýn yfir allt sveitarfélagið.
Þjónustu við eldri borgara þarf að efla og treysta rekstrargrundvöll Lundar.
Æskulýðs og forvarnarstarf þarf að stórefla.

Svo mætti lengi telja.

Verkefnin eru mörg og af nógu er að taka þegar hugað er að betra samfélagi, samfélagi sem setur manngildið í fyrsta sæti.

Og þá er bara að taka til óspilltra málanna með framboðsmálin.
Í næstu viku munu línur skýrast með þau mál.

Sæl að sinni, Viðar.

Framboðsmál í Rangárþingi ytra.

2006-03-19T15:38:00.000Z

Sæl nú.
Þá eru línur eitthvað að skýrast í framboðsmálum í Rangárþingi ytra.
Framsóknarmenn segjast vera að ljúka við samsetningu á lista og hafa hafnað aðkomu að sameiginlegu framboði miðju og vinstrimanna hér.
Ég vona, og er þá að hugsa um bæði sóma Framsóknarmanna og lýðræðið, að þeir sýni meiri ábyrgð en þeir hafa gert á yfirstandandi kjörtímabili. Það hefur því miður of oft komið fyrir að fulltrúi Framsóknarmanna hafi mætt á hreppsnefndarfundi með umlagið utan um fundargögn lokað og það kalla ég vanvirðu við kjósendur og lýðræðið.
Sjálfstæðismenn eru komnir með þá sem taka munu þátt í prófkjöri þar á bæ. Ljóst er að þar mun verða mjög harður slagur um efstu sæti þar sem 3 hafa sett stefnuna á 1. sætið og fleiri en einn um næstu sæti þar fyrir neðan. Athygli vekur að af þeim sem sækjast eftir efstu sætum þá vekur athygli að verulega margir frambjóðenda eru ættaðir frá Ægissíðu. Þannig að það stefnir kannski í að þar verði um Ægissíðu slagsíðu að ræða en það kemur nú allt í ljós.
Hitt er alveg ljóst að um ákveðið uppgjör verður að ræða hjá Sjálfstæðismönnum sem hefur verið undirliggjandi um langan tíma.
Vonandi koma allir heilir frá þeim hildarleik en það sem er mikilvægast er að það bitni ekki á sveitarfélaginu ef illa fer.

Því segi ég við ykkur íbúa Rangárþings ytra gefum sjálfstæðismönnum frí til að jafna málin í eigin herbúðum og í leiðinni láta á reyna hvort ekki séu aðrir möguleikar í stöðunni.
Ekki er af svo glæsilegum árangri að státa hjá þeim á undangengnum árum og áratugum það sýnir staða sveitarfélagsins fyrr og nú svo hver er áhættan önnur en von um berti tíð.

Það er mikil þörf á að breytingar verði á stjórn okkar ágæta sveitarfélags til að leysa það úr læðingi stöðnunar og illvígra persónulegra deilna innan Sjálfstæðisflokksins. Sveitarfélagið þarf ekki og á ekki að vera í herkví slíks ástands. Breytum því.

Ég boða hér með að hafinn er undirbúningur að framboði samvinnu, jafnaðar og vinstrimanna í okkar sveitarfélagi. Þegar hefur verið rætt við stóran hóp fólks og undirtektir hafa verið góðar og hugur í fólki.
Ég hef bent fólki á að hafa samband við þann sem hér skrifar ef það hefur ábendingar um fólk eða málefni og hefur því verið vel tekið og vil ég hér með enn á ný hvetja íbúa til að vera í sambandi.
Sæl að sinni, Viðar.

Aðalfundur LBHÍ - Guðni fær hrós.

2006-03-17T20:39:00.000Z

Sæl nú.
Var á aðalfundi LBHÍ á Selfossi í dag. Vel til fundið hjá Ágústi rektor að koma með fundinn á Suðurland og eflaust spilar þar inn í Sunnlenskur uppruni hans. Gaman var að fá kynningu á hinu fjölbreytta námi sem er í boði hjá skólanum. M.a. var sagt frá hvernig skólinn starfrækir útstöðvar sínar og er samstarfsaðili við aðra skóla og stofnanir.
Ég sé fyrir mér að þarna væri tækifæri fyrir okkur Rangæinga til að efla hér æðri menntun. Gæti séð fyrir mér að hugmyndir um fræðasetur Landgræðslunnar í Gunnarsholti gætu orðið að raunveruleika með þannig samstarfi Landgræðslu og LBHÍ þar sem sveitarfélagið væri þriðja hjól undir vagni í því formi að liðka til með ytra umhverfi og fá stuðning ríkisins. Einnig mætti hugsa sér, að þegar lokið verður uppbyggingu á Gaddstaðaflötum, þá verður þar til staðar aðstaða sem hugsanlega mætti nýta til að setja á stofn útstöð frá LBHÍ varðandi eitthvert afmarkað svið hestamennsku og hrossaræktar.

Sem segir okkur það að menn þurfa að spýta í lófa í þeirri uppbyggingu.!!

Á fundinum hitti ég m.a. Landbúnaðarráðherran Guðna og hann fékk að þessu sinni hrós frá mér vegna ummæla hans vegna brotthvaðningar BNA hers.
Meðan Forsætis og utanríkisráðherra voru enn á hnjánum ef ekki marflatir fyrir fótum Kanans þá lét Guðni þá heyra það og gerði sitt til að bæta laskaða sjálfsmynd þjóðarinnar.
Það hefur verið vægast sagt ömurlegt að horfa upp á það hvernig núverandi forsætisráðherra hefur skriðið fyrir BNA mönnum og þar er auðvitað lægsta lægðin stuðningurinn við Íraksstríðið sem hann lagði á þjóðina ásamt fyrrverandi forsætisráðherra.
Íslenski fáninn var dreginn að hún hér á Kaldbak í gær eins og til stóð og í dag segi ég húrra fyrir Guðna Ágústssyni vegna ummæla hans í dag og fyrir Ágústi Sigurðssyni fyrir að koma með ársfundinn til okkar á Suðurland og það góða starf sem hann er að leggja að mörkum sem rektor LBHÍ.
Gott að sinni, kveðja Viðar.

Eftirköst Davíðskunnar

2006-03-15T21:26:00.000Z

Það hlýtur að vera flaggað í hálfa í Seðlabankanum þessa dagana og Valhöll líka.
Nú er Íslenskt þjóðfélag að upplifa timburmennina eftir valdatíð Davíðs. Ég spái því að eftirskjálftar þeirra stóru skjálfta, sem nú ríða yfir þjóðfélagið og munu gera á næstu mánuðum, muni síðan allt að því "tremma Sjálfstæðisflokkinn í hel" og það finnst mér mikil synd.
Framan af var Sjálfstæðisflokkurinn frjálslyndur flokkur hægra megin að miðju. Á síðasta áratug síðustu aldar varð flokkurinn hins vegar fámennri frjálshyggjuklíku að bráð sem sveigði hann yst til hægri og tók Íslenskt þjóðfélag með sér í það ferðalag. Við erum að gjalda fyrir það og verðum enn um sinn.

Það hefur í langan tíma verið reynt að stagla ofan í þjóðina að hér sé góðæri og stöðugleiki, mikið efnahagsundur á ferð.

Ráðamenn hafa verið á hnjánum í BNA við að halda hernum hér án þess að vita af hverju og algerlega á móti vilja BNA manna. En alltaf hefur þjóðinni verið sagt að málið sé í traustum höndum "persónulegra tengsla" ráðamanna við BNA stjórn m.a. vegna stuðnings við Íraksstríð.

Ríkislögreglustjóra er sigað berfættum og vettlingalausum á bisnessmenn sem voru "Valhallarklíkunni" ekki að skapi líklega til að halda "aga í hernum" eins og góði dátinn Sveik orðaði það.

Fréttir undanfarinna vikna hafa hins vegar verið undirlagðar af spám aðallega erlendis frá um fallvaltleika Íslensks efnahagslífs.
Verðbréf hafa fallið í verði og gengi krónunnar lækkað. Öll viðvörunarljós efnahagslífsins virðast blikka í rauðum lit.

Svo kemur þessi miðvikudagur með sín stóru tíðindi.

Herinn burt og Baugsmenn með geislabaug frá héraðsdómi.
Eftir standa stjórnarherrar á nýju fötunum keisarans einum fata frammi fyrir þjóðinni og það gefst á að líta eða hitt þó heldur.

En eins og fyrri daginn þá má segja að fátt sé svo með öllu illt að ekki boði eitthvað gott.

Herinn fer sem er gleðilegt skref í sjálfstæðissögu Íslands. Nú er hægt að snúa sér að því að búa til "Landsbjargargæslu" Íslands og gera landið þar með loksins frjálst og fullvalda. Það verður flaggað að húni á Kaldbak á morgun í tilefni af fréttum af brottför hersins.
Þjóðin mun loksins komast úr viðjum hermangsins og alls sem því hefur fylgt m.a. ítök Sjálfstæðisflokksins í skjóli þess.
Þjóðin mun velja sér jafnaðarmenn til að stýra hér málum á næstu árum á hófsaman hátt með manngildi ofar auðgildi og áherslu á að EINSTAKLINGARNIR fái að njóta sín í samfélagi sem virðir þá og metur.

Það er sem betur fer bjart fram undan hjá ríkri og dugmikilli Íslenskri þjóð þrátt fyrir að hafa lent á þessu frjálshyggju kendiríi.

Góðar stundir. Viðar.

Pólitísk "rétthugsun".

2006-03-11T12:59:00.000Z

Sælt veri fólkið.
Nokkrar umræður hafa að undanförnu verið um fyrirbæri sem kallast pólitísk "rétthugsun". Þessi umræða hefur komið upp m.a. vegna þess að nýlega hefur verið gerð í BNA mynd um ævi Joe McCarty sem var þingmaður þar vestra snemma á sjötta áratugnum og vann það sér helst til frægðar að komast til frama í pólitík með lygum og prettum og reyna síðan að bjarga sínum pólitíska ferli með því að gerast kommahatari.
Og nota bene hann náði hljómgunni meðal margra BNA manna í ótrúlega langan tíma. Svo fór þó að lokum að augu manna opnuðust gagnvart McCarty og nú er saga hans einn svartasti blettur í stjórnmálasögu BNA. Myndin verður væntanlega sýnd hér áður en langt um líður og hvet ég alla til að sjá hana því efni hennar hlýtur að vera öllum hollt til umhugsunar.

Inntakið í pólitískri rétthugsun og McCarty isma er að stimpla alla þá sem voga sér að opna munninn, eða stinga niður penna, til að koma á framfæri gagnrýni á rikjandi skoðun, ástand og stjórnvöld.

McCarty stimplaði alla kommúnista sem gagnrýndu Bandarískt þjóðfélag og stjórnvöld á þeim tima og lenti fjöldi fólks í miklum hremmingum af hans völdum.
Ef við setjum pólitíska "rétthugsun" inn í okkar nútíma þá sjáum við hennar víða stað. Allir sem fylgjast með Íslenskri pólitík þekkja dæmin.
Hver kannast ekki við viðbrögð stjórnvalda við gagnrýni á t.d. skattamál,Öldrunarmál,stóriðjumál, einkavæðingu,öryrkjamál og fl.
Ef gagnrýnin er frá fræðimönnum eða hagsmunahópum, eins og félagi eldri borgara, Öryrkjabandalaginu eða öðrum, þá svara stjórnvöld að annað hvort kunni menn ekki að reikna eða þá misskilja og ef það ekki dugir þá er því slengt fram að viðkomandi sé í pólitík.
Nú ef gagrýnin kemur af hinu pólitíska sviði þá eru menn jú bara á móti öllu, kommar eða kratar og ef ekki vill betur afturhaldskommatittir.
Svona er nú umræðan mjög í McCarty´s anda á Íslandi í dag.

Ég ætla að lokum að minnast á hvernig pólitísk "rétthugsun" birtist mér í okkar litla samfélagi hér í okkar sveitarfélagi.
Ein hlið þess snýr að því hve erfitt er að fá fólk til að bjóða sig fram til að starfa að sveitarstjórnarmálum hér. Þegar talað er við fólk um að ganga fram fyrir skjöldu þá er það mjög oft hrætt við að styggja ríkjandi öfl sem hér í Rangárþingi ytra eru Sjálfstæðisflokkurinn. Hin pólitíska umræða hér gengur út á það að stimpla þá sem ganga gegn ríkjandi öflum og gera þá tortryggilega. Heyrum við ekki að minnihlutinn sé á móti ÖLLU-JÁ ÖLLU. Ef sá sem gagnrýnir er ekki sjálfstæðismaður þá er ekki að marka og hann er bara á móti, er kommi jafnvel krati eða frammari sem er þó skárra því þeir eru í útrýmingarhættu og þess vegna ekki eins hættulegir.
Og ef einhverjir merktir D fara út af línunni og jafnvel í samstarf við vafasama aðila þá er litið á þá sem pólitískt holdsveika meðan á því samstarfi stendur.
Annar flötur á þessu þankagangi er að fólk er hreinlega hrætt við að missa vinnu vegna"óhefðbundinna" pólitískra skoðana ef það lætur þær uppi. Ég get persónulega vitnað um að slíkt er fyrir hendi hér.
Eins og þið flest vitið var ég um tíma að vinna fyrir Rangárbakka Hestamiðstöð Suðurlands en hætti því fyrir um ári síðan. Starf sem ég hafði mikla ánægju af og áhuga á.
Eina ástæða þess að ég sagði þessu starfi lausu var að það barst athugasemd til stjórnarmanna um að starfsmaður Rangábakka væri ekki af réttum pólitískum lit.
Ég tek það skýrt fram að stjórn Rangárbakka stóð heilshugar á bak við mig þegar þetta kom upp en ég taldi mér ekki sætt lengur vegna þess hugsanlega möguleika að ég myndi skaða félagið í sókn þess í opinbert fjármagn.
Þannig að ég veit af eigin reynslu að þessi ömurlegi þankagangur er til hér og ótti fólks vegna þessa því ekki ástæðulaus.
Þessum hugsunarhætti verðum við að breyta því þetta er ein af helstu ástæðum þess að hér ríkir stöðnun en ekki framfarir. Þar sem eru þröskuldar fyrir gagnrýna hugsun og og hugarfar manna mótast af pólitískri "rétthugsun" verður slíkt ástand viðvarandi.
Frjáls hugsun er það sem gerir hvern mann sjálfstæðan einstakling, hugsum um það.
Sæl að sinni Viðar.

Baknag a-la Gróa á Leiti.

2006-03-10T22:35:00.000Z

Gott kvöld.
Í þetta sinn ætla ég að segja ykkur frá því sem er dapurlegast við að starfa í pólitík.
Í dag hitti ég sveitunga minn og ágætan kunningja sem sagði mér frá samtali sem hann varð vitni að nú nýverið. Til umræðu voru sveitarstjórnarmál í Rangárþingi ytra. Einum af þeim sem voru í þessari umræðu var sérlega uppsigað við þá sem hafa skipað minnihluta hreppsnefndar á því kjörtímabili sem er að líða. Taldi hann að þeir hefðu verið á móti öllu sem lagt væri til og hóf síða mikinn lestur um hvern og einstakan í hópnum þar sem hann jós óhróðri yfir persónur viðkomandi og fjölskyldur þeirra.
Mín fyrstu viðbrögð við að heyra þetta voru að hugsa að þetta væri nú bara veikur maður sem þarna talaði og þetta gæti ekki haft nein áhrif á viðhorf fólks yfirleitt.
Mér brá hinsvegar þegar ég hitti annan sveitunga minn, og enn komu sveitarstjórnarmálin til umræðu, þegar sá fann að því við mig að við minnihlutamenn værum á móti ÖLLU.
Þó að þessi viðmælandi endurómaði sem betur fer ekki baknagið og Gróusögurnar þá sá ég að málflutningur sem byggður er á óljósum alhæfingum, krydduðum með persónulegum óhróðri fá hljómgrunn því miður.
Þegar ég síðan gekk á þennan viðmælenda minn um að nefna sérstök dæmi máli sínu til stuðnings þá varð fátt um svör. Þegar ég síðan tiltók nokkur mál sem hafa verið afgreidd nýlega hjá sveitarstjórn og sagði honum hvernig hefðu gengið fyrir sig þá kom hann af fjöllum og vissi nákvæmlega EKKI neitt um málin. Spurði ég hann þá hvernig hann hefði komist þeirri niðurstöðu að við minnihlutamenn værum á móti öllu þá sagði hann að þetta væri SAGT.
Nú já hugsaði ég, Gróa hefur hljómgrunn eins og fyrri daginn og mér (okkur) hefur mistekist að koma mínu (okkar) sjónarhorni á framfæri.
Mig langar því allri einlægni að biðja ykkur kæru sveitungar að taka afstöðu til mála eftir að hafa kannað málin sjálf, hafið endilega samband og spyrjið spurninga og fáið upplýsingar.

Nú skal það tekið fram að þó þau dæmi sem hér eru tekin snúi að ákveðnum persónum þá skuluð þið muna að það sama gyldir ef slík umræðan snýst um aðra t.d. meirihlutann í Rangárþingi ytra.

Pólitísk átök eiga að vera málefnaleg, sanngjörn og snörp ef svo ber undir en algjört skilyrði er að skilja á milli pólitíkur og persónu að ekki sé talað um fjölskyldur og vandamenn.
Ekki láta mata ykkur á skoðunum sem byggðar eru á fordómum og alhæfingum og ALLS EKKI taka þátt í persónulegum níð af neinu tagi né láta slíkt stjórna skoðunum ykkar.
Með lýðræðiskveðju, Viðar.

Til hamingu með daginn konur.

2006-03-08T12:56:00.000Z

Sæl nú.
Til hamingju með daginn konur. Gerið endilega eitthvað í tilefni dagsins til dæmis um það sem er í boði er eftirfarandi:>

Alþjóðlegum baráttudegi kvenna fagnað
Öll helstu samtök launafólks standa í dag fyrir opnum hádegisverðarfundi á Grand Hóteli í Reykjavík í tilefni alþjóðlegs baráttudags kvenna.Yfirskrift fundarins er "Konur og hnattvæðing - er heimurinn eitt atvinnusvæði?" Síðdegis verður efnt til opins fundar í Ráðhúsi Reykjavíkur og hefst hann klukkan 17. Að fundinum standa fjölmörg hagsmunasamtök launafólks auk samtaka kvenna af erlendum uppruna, samtaka um kvennaathvarf, Stígamót, Öryrkjabandalag Íslands og Kvenréttindafélag Íslands svo einhver séu nefnd. Þar mun hljómsveitin Amina spila fyrir gesti. Í kvöld heldur femínistafélagið Bríet svo baráttufund þar sem leitast verður við að endurskapa stemmningu baráttuára Bríetar Bjarnhéðinsdóttur. Fundurinn verður á Dubliners og hefst klukkan 20 í kvöld. Í háskólanum á Akureyri verður rithöfundurinn Gunnar Hersveinn með erindi um arfmyndir kynjanna í auglýsingum og hefst það klukkan hálf fimm.
Jafnrétti alla daga,
kveðja Viðar.

Áhugaverð grein

2006-03-08T09:33:00.000Z

Sæl nú.
Sá þessa grein á Vísi í morgun, ber hana til ykkar meðan ég sötra kaffið, lítið á það> www.visir.is/apps/pbcs.dll/article?AID=/20060308/SKODANIR04/103080053/1037
Sjáið einnig frétt á Vísi sem fjallar um flutning á starfsemi Marel austur Evrópu.
Svo tala ráðamenn eins og allt sé í sóma og kynda bara af enn meiri krafti undir álkötlunum.
Kveðja Viðar.

Forgangsröðun og fordæmi

2006-03-07T14:08:00.000Z

Sælt veri fólkið.
Var að tala við formann Rangárbakka hestmiðstöðvar um það sem er fram undan á Gaddstaðaflötum. Verið er að vinna að því að fá sem mest fjármagn úr reiðhallarsjóði landbúnaðarráðherra. Til að sem mestur árangur náist þurfa sveitarfélögin í sýslunni að standa þétt á bak við verkefnið bæði móralskt og með umtalverðu fjármagni. Erindi þess efnis er á leiðinni til sveitarstjórnanna. Mikilvægt er að rúm sé fyrir slík fjárframlög hjá sveitarfélögunum og samstaða um að leggja þau fram.

Það leiðir hugann að því að sveitarstjórnirnar hafa ekki ótakmarkað fjármagn til slíkra hluta og þurfa að vanda sig þegar verkefni eru valin sem styrkja skal myndarlega. Í gegn um tíðina hafa slík framlög farið í gegn um Héraðsnefnd og eingöngu verið bundin við sameiginleg verkefni sveitarfélaganna svo sem Byggðasafn í Skógum og einnig verkefni sem fjölmenn félagasamtök standa á bak við.
Það er því algjört stílbrot þegar Héraðsnefnd leggur nú til að sveitarfélögin í Rangárvallasýslu styrkji einkaaðila um 10 milljónir króna á þremur árum.

Þarna er í fyrsta lagi verið að gefa fordæmi sem sveitarsjóður okkar í Rangárþingi ytra ræður ekki við, aðrir verða að dæma um hvað við á í Ásahreppi og Rang eystra.
Í öru lagi skerðir þetta möguleika sveitarfélaganna á að koma með krafti að verkefnum eins og uppbyggingunni á Gaddstaðaflötum sem ég álít að sé "dæmigert" verkefni sem sveitarfélögin geta staðið að sameiginlega.
Og í þriðja lagi er þetta að mínu áliti ekki góð meðferð á fé skattgreiðenda í ljósi þess sem að framan greinir..

Ég læt fylgja með afgreiðslu sveitarstjórnar Rangárþings ytra á þessu erindi svo þið getið séð hvernig það var afgreitt þar

Hér kemur það beint ú fundargerðarbókinni:

2. Fundargerðir nefnda, ráða og stjórna til staðfestingar:
2.1 Héraðsnefnd Rangæinga - 16. fundur 2/2 2006 í 8 liðum.

Héraðsnefnd gerir tillögu um aukið framlag til Héraðsnefndar á árinu 2006 vegna styrkveitingar skv. 2. lið fundargerðarinnar.

Tilmæli um aukið framlag vegna styrkveitingar sbr. 2. lið fundargerðarinnar samþykkt með 6 atkvæðum, 3 sitja hjá (VHS. ÞS. HH.) Fjárveitingu vegna þessarar samþykktar er vísað til endurskoðunar á fjárhagsáætlun.

Undirritaður fulltrúar K- og Ó-lista leggja fram eftirfarandi bókun:
"Undirritaðir sitja hjá við afgreiðslu þessa máls. Ástæðan er ekki sú að hugmyndin sem slík sé ekki góðra gjalda verð. Við teljum að Héraðsnefnd Rangæinga sé að marka nýja stefnu í styrkveitingum til einstakra aðila hvað upphæð varðar. Við bendum á fordæmisgildi þeirrar ákvörðunar að styrkja einstaka aðila um 10 milljónir króna og spyrjum hvort okkar skulduga sveitarfélag muni rísa undir því fordæmi. Við hefðum viljað styrkja þetta ágæta verkefni með lægri upphæð og hefðum talið það ábirgari afstöðu gagnvart sveitarsjóði Rangárþings ytra.
Heimir Hafsteinsson. Þröstur Sigurðsson. Viðar Steinarsson."

Þannig lýtur það nú út. Málið hefur ekki enn verið afgreitt í sveitarstjórn Rangárþings eystra en ég ætla ég að vona að þeir komi skynseminni inn í þetta mál.

Hvað finnst ykkur??

Kveðja Viðar.

Í minningu Oddaverja hinna seinni

2006-03-05T19:58:00.000Z

Komið þið sæl.
Þá er það orðið ljóst að ekki verður boðið fram undir merkjum Oddaverja í komandi sveitarstjórnarkosningum.
Ég sagði frá því í pistli 22. febrúar hér á síðunni að haldinn var Oddaverja fundur í Árhúsum. Eins og ég sagði frá þar þá var mikill hugur í fólki og eindrægni. Málin voru sett í þann farveg að stjórn var falið að skipa uppstillingarnefnd sem átti að hafa það umboð að koma fram með tillögu að uppstillingu á framboðslista. Áður en að stjórnin hafði ráðrúm til að koma saman til að setja uppstillingarnefnd á laggirnar þá fór af stað atburðarás sem gerði það að verkum að trúnaðarbrestur kom upp í samstarfinu þar sem jafnréttismál spiluðu stórt hlutverk. Síðastliðið miðvikudagskvöld var svo haldinn "krísufundur" þar sem reynt var að sætta sjónarmið. Það tókst ekki og sögðu hreppsnefndarfulltrúarnir Þröstur Sigurðsson og undirritaður Viðar Steinarsson sig þá þegar frá frekara samstarfi og sömu leið gekk svo Heimir Hafsteinsson s.l. föstudag.
Þetta er í sjálfu sér mjög dapurleg en um leið furðuleg niðurstaða, því frá mínum bæjardyrum þá hefur samstarfið gengið mjög vel.
En svona er það og nú er komin upp ný staða í framboðsmálum í Rangárþingi ytra miðað við það sem áður var að stefnt.
En í hverju skipsbroti felast ný tækifæri þannig að þegar upp er staðið er ég viss um að út úr þessu mun koma eitthvað jákvætt.
Ég óska þeim Heimi og Þresti velfarnaðar í því sem þeir gera í framhaldinu og þakka þeim gott samstarf á kjörtímabilinu.
Hvað sjálfan mig varðar er allt óráðið, en ekki líst mér á að hér verði bara val um að kjósa B eða D.
Ef þið eruð sama sinnis og viljið vinna að meira framboði þá hafið endilega samband í síma 8621957 eða sendið tölvupóst á kaldbakur@emax.is nú og svo eru það commentin hér að neðan.
Já pólitíkin býður upp á margt óvænt, ekki bara hjá Oddaverjum. Frétt dagsins var skyndilegt brotthvarf Árna Magg.
Sæl að sinni, Viðar.

Skipulagsdagur

2006-03-04T20:01:00.000Z

Sæl nú.
Mætti á skipulagsfundinn um deiliskipulag nýs hesthúsahverfis annarsvegar og um hugmyndavinnu vegna skólareits.
Það var mjög góð mæting sérstaklega á fyrri liðinn og var fólk duglegt að koma með hugmyndir og ábendingar.

Varðandi endanlega útfærslu, á annars mjög álitlegu deiliskipulagi hesthúsahverfis, er mikilvægt að skoða betur nokkur atriði að mínu mati.

Þar er fyrst að nefna að skýra þarf betur aðkomu að svæðinu frá þorpinu og þá helst hvað varðar gönguleið með undirgöngum undir þjóðveginn.
Sýna þarf með ákveðnari hætti hvernig reiðleiðir að og frásvæðinu eru hugsaðar.
Ahuga þarf nánar hvort staðsetning reiðhallar er á hentugasta stað með tilliti til nýtingar möguleika í tengslum við Gaddstaðaflatasvæðið.
Huga þarf betur að þörfum atvinnumanna varðandi stærð húsa og lóða og byggingamöguleika sem og varðandi beitarmöguleika.

Hvað skólareitinn varðar komu fram margar góðar hugmyndir um framtíðar fyrirkomulag. Margt bar á góma m.a. hugmynd Lovísu Sig að flytja keikskólann af skólareitnum og byggja nýjan við eða í nágrenni við Lund. Þannig myndu íbúar byrja og enda sinn feril á sama stað eins og Bjarni Alla orðaði það svo vel. Sigurgeir skólastjóri vildi að gert verði ráð fyrir að framhaldsskóli verði byggður á skólareitnum og Ragnar Páls vildi að þegar skipulagið verði unnið þá hugsi menn verulega til framtíðar og varaði sérstaklega við því að fórna svæðinu norðan íþróttavallar. Margt fleira var rætt og nú er boltinn hjá okkur í sveitarstjórn að bretta upp ermar og vinna málið áfram.

Ef þið viljið koma á framfæri einhverjum ábendingum til sveitarstjórnar þá megið þið skilja eftir skilaboð á þessari síðu og ég mun koma þeim áfram.

En svona í lok þessa pistils er rétt að þakka gott framtak við þessa kynningu sem er mjög góð nýbreytni hjá byggingafulltrúa og bygginganefnd.

Sæl að sinni, Viðar.

Fuglaflensa

2006-03-03T13:10:00.000Z

Sæl nú.
Vegna fyrirspurna sem ég hef fengið um hvort sveitarstjórn eða búfjáreftirlitsnefnd muni koma á framfæri upplýsingum um viðbrögð vegna hugsanlegra fuglaflensutilfella hér, þá er því til að svara að það hefur ekki verið rætt enn sem komið er en verður væntanlega ef hættustig verður hækkað hér á landi. Vil benda á ágætar upplýsingar um fuglaflensuviðbrögð sem eru á vef Búnaðarsambands Suðurlands.
Tengill inn á síðu Búnaðarsambandsins er hér á síðunni til vinstri.
Kveðja Viðar.

Áminning um skipulagsfund.

2006-03-02T17:26:00.000Z

Til allra sem þetta lesa en ekki hvað síst hestamanna!!!!

Munið kynningu á deiliskipulagi nýrrar og glæsilegrar hesthúsabyggðar á Hellu sem verðu í Grunnskólanum á Hellu laugardaginn 4 mars n.k. frá kl. 11-13. Um er að ræða hverfi fyrir 1500 hross með miklum stækkunarmöguleikum.

Einnig verða kynntar hugmyndir um breytingar á skólareit við grunnskólann á Hellu.
Komið, kynnið ykkur og komið með hugmyndir í púkkið.
Sæl að sinni Viðar.

Ljóð ort í tilefni dagsins

2006-03-02T17:16:00.000Z

Ljóð.
Ég man enn þann dag sem hann gerst hafi í gær
þegar hjarta mitt tók af mér ráð.
Ég vissi ekki í heiminn hérna eða fjær,
því minn hugur var lostinn í bráð.

Og sólin hún skein allt var bjart og svo ljúft,
og söngfuglar sungu um dal og um hlíð.
Þennan dag var ég numinn og mér fannst það svo sælt,
ég var numinn og verð alla tíð.
Kveðja Viðar

Reiðhöll á Gaddstaðaflatir

2006-02-28T23:58:00.000Z

Góða kvöldið.
Byrja á að kynna könnunina um lágvöruverðverslun á Hellu.
Endilega takið þátt.
Var í kvöld á aðalfundi Hestamannafélagsins Geysis. Því miður örfáir mættir í 500 manna félagsskap. En svona er nú félagsstarf nú orðið, allt of lítil mæting í starfið og fundi. Góður fundur þar sem meðal annars var samþykkt að sækja um í reiðhallarsjóð Landbúnaðarráðherra. Vonandi tekst að ná þar sem mestu fjármagni með því að allir snúi bökum saman um að ná árangri. Rangárbakkar, hmf Geysir og sveitarfélög á svæðinu eiga að leggjast saman á árarnar um að fá hámarks framlag frá ríkinu og leggja síðan annað eins á móti. Síðan á að kanna í þaula hvort hægt sé að laða að fjárfesta til að leggja fram verulegt fjármagn til uppbyggingarinnar. Líklegt er að það geti heppnast ef vel tekst upp við að ná saman stuðningi ríkis og sveitarfélaga.
OKKAR sveitarfélag, Rangárþing ytra á þarna að leiða hópinn því hér eru mestir hagsmunir að vel megi takast. Inn í þann stuðning getur komið margt annað en einungis fjárhagsleg aðkoma. Þar má nefna að leggja til land, nota aðliggjandi lóðir sem agn fyrir fjárfesta ásamt því að veita ómældan móralskan stuðning.
Um þetta þurfum við að standa vel saman og þá munum við sjá stór tækifæri opnast á svæðinu.
Meira um það síðar.
Sæl að sinni,
Viðar.

Sunnudagur fyrir sálina.

2006-02-26T20:47:00.000Z

Komið þið sæl.
Hvað er meira viðeigandi en að velta fyrir sér kjarna lífsins, spurningum og svörum mennskuna, á sunnudagskvöldi.

Var að horfa á þáttinn sjálfstætt fólk á stöð tvö áðan sem fjallaði um mannúðarstarf Njarðar P Njarðvík í Afiríku. Í hvert sinn sem maður sér þætti sem þennan, sem opnar glugga inn í veröld sem er okkur hér á vesturlöndum algjörlega framandi,fær maður sektartilfinningu. Þarna snýst lífið um frumþarfirnar að hafa í sig og á og ekkert umfram það. Og tölfræðin er rifjuð upp fyrir okkur, 2/3 mannkyns eiga verla til hnífs og skeiðar og þar af býr 1 af hverjum 10 við algera örbirgð og í mörgum tilfellum stríðsástand í ofanálag. Frammi fyrir þessum staðreyndum verður manni litið niður með eigin nefi og verður hugsað til þess hyldýpis sem er á milli þeirrar ofgnóttar og óhófs sem hér tíðkast og þess sem stór hluti mannkyns upplifir.
OG- þrátt fyrir það að margt gott sé gert til að brúa þetta bil, af smáum aðilum eins og Nirði P Njarðvík og einnig stórum hjálparstofnunum og ríkisstjórnum, þá er staðreyndin samt sú að bilið milli snauðra og ríkra í veröldinni er sífellt að breikka.
EN hvers vegna, hvað veldur og hvað er til ráða.
Þegar spurningarnar eru stórar þá verður oft lítið um svör eins og alkunna er. En við verðum samt að reyna hvert og eitt að koma með okkar tillögu að svari og lausn.
En við leitina að svarinu skulum við varast að reyna að finna upp einhvert sannleikshjól, eitthvað alsherjar elexsír sem öllu bjargar.
Mannkynið á nefnilega svörin til, það þarf bara að tína þau saman og raða uppá nýtt. Eða er ekki í öllum helstu trúarbrögðum og siðferðiskenningum heimsins kærleiksboðskap að finna sem væri vel nothæfur sem vegvísir að betri heimi ef mannkynið færi eftir honum?

Mín tillaga er því sú að stofnað verði vitringaráð á vegum SÞ sem fegi það hlutverk að búa til nýja samræmda "ritningu" úr því besta úr trúarboðskap og siðferðiskenningum heimsins. Er ekki kominn tími til að aðlaga helstu gildi siðmenningar að nútímanum þegar fyrir liggur að það sem við höfum dugar okkur ekki.
Annars er ég hræddur um að mannkynið verði áfram að glíma við afleiðingarnar af því þegar synir Abrahams þeir Ishmael and Isaac fóru hvor sína leiðina fyrir þúsundum ára og urðu forfeður Araba og Gyðinga.
Er það t.d. ekki í raun sá atburður sem er frumorsök ástandsins í suðupotti miðusturlanda nú?
Lifið heil,
Viðar.

Tollfrelsi

2006-02-24T23:08:00.000Z

Komið þið sæl.
Í dag bárust gleðilegar fréttir úr Utanríkis og landbúnaðarráðuneyti varðandi tollfrelsis samninga við ESB á grundvelli EES samningsins.(Mikill snillingur er Jón Baldvin að koma þessum samningi í gegn á sínum tíma, samningurinn hefur verið undirstaða velgengni í efnahagsmálum Íslendinga síðan og er enn.)
Nú fá þeir félagar Guðni og Geir prik frá mér fyrir góða frammistöðu við að nýta möguleika EES samningsins og á þessu sést að sá umdeildi samningur er nokkurs virði enn í dag þrátt fyrir ýmis orð um annað.

Þessir nýju möguleikar eiga eftir að verða landbúnaðinum dýrmætir og nú er að bretta upp ermar og nýta þá sem best. Sala hrossa til Evrópu á eftir að taka kipp við þetta á næstu árum og leiða til mikillar gullaldar hjá hrossaræktendum ef rétt er á spöðum haldið. Þetta verður viðbót við þá miklu grósku sem verið hefur í greininni hér innanlands undanfarin ár.

Og úr því ég er að tala um hestamennsku þá tek ég ofan hatt minn fyrir VIS keppninni. Þarna er kominn fyrsti vísir að keppnisformi sem á eftir að eflast og þróast á næstu árum og auka veg hestamennskunnar á allan hátt og auka fjölmiðla umfjöllun um hana.
Sæl að sinni Viðar.
ES. Halló er einhver að lesa, ef svo gefið "comment"

Fundur um framboðsmál.

2006-02-22T23:51:00.000Z

Góða kvöldið.
Var að koma af Oddaverjafundi í Árhúsum þar sem framboðsmál voru á dagskrá. Tuttugu manns voru mættir sem er þokkalegt á mælikvarða fundarmætingar hér um slóðir. Á fundinum voru líflegar og gagnlegar umræður um málefni sveitarfélagsins og mikill hugur í fólki. Ákveðið var að bjóða fram lista til sveitarstjórnar á vori komanda og stjórn félagsins falið að vinna málið áfram og boða til fundar sem fyrst aftur. Nokkrir einstaklingar lýstu yfir að þeir væru tilbúnir í framboð en fundarmönnum að öðru leiti falið að koma með ábendingar og tillögur til að vinna úr. Þeir sem lesa þennan pistil og vilja gefa kost á sér eða geta bent á einhvern sem væri vænlegur endilega komið því á framfæri annað hvort í Commenta dálkinn hér á þessari síðu eða til einhverra af aðstandendum Oddaverja.

Svekk að Eiður og félagar skuli hafa tapað í kvöld en nú er bara að taka á því á Nývangi eftir hálfan mánuð.
Annars er þetta Barselona lið frábært og kæmi ekki á óvart að þeir færu alla leið í Meistarakeppninni þetta árið.
Góða nótt, Viðar.

Gleðilega Góu.

2006-02-19T22:12:00.000Z

Jæja þá er Þorrin liðinn og eins og veðrið var í dag þá finnst mér að það sé komið vor, þvílík blíða. Sól, logn og átta stiga hiti yfir miðjan daginn.
Þau voru falleg fjöllin okkar þegar sólin gyllti þau árdegis. Forréttindi að eiga þetta umhverfi til að vakna upp við dag hvern og sofna frá á kvöldin. En það er ekki sjálfgefið og það er gott að muna.
Nóg að sinni.
Viðar.

Hellisheiði.

2006-02-17T00:30:00.000Z

Komið þið sæl.
Var að koma af fundi um vegabætur á Hellisheiði. Góður fundur og þarft framtak að halda hann af SASS. Samgönguráðherran hélt tölu og svaraði fyrirspurnum og eftir því hvernig hann talaði í kvöld þá er ekki von á tvöföldum á veginum milli Selfoss og Reykjavíkur næsta áratuginn.
Ráðherrann talaði allan tímann um 2+1 í áföngum á næstu árum.
Ég segi, og held að ég tali þar fyrir munn allflestra sunnlendinga, við viljum ekki 2+1 við viljum tvöföldun, tvær aðskildar akgreinar í hvora átt og ekki neitt múður um annað. Fyrir því hafa verið borin á borð næg rök af hálfu SASS og fleiri aðila sem hafa verið að berjast fyrir vegabótum á Hellisheiði. Það liggur t.d. fyrir að umferðarþungi og slysatíðni á Hellisheiði nú er um það bil sú sama og var á Reykjanesbraut þegar ákveðið var að tvöfalda hana. Það þarf ekki frekari vitna við nú þarf að grípa til aðgerða og það sem fyrst EÐA á að bíða eftir jafn hörmulegu atviki á Hellisheiði og varð á Reykjanesbraut og sem varð til þess að menn hófust handa við tvöföldun þar.
Vonandi þarf ekki að koma til þess, en til þess að ráðherrann og yfirmenn vegagerðarinnar sjái ljósið þá VERÐA þingmenn okkar allir sem einn að tala svo skiljist og þá ekki síst þeir sem eru í stjórnarliðinu nú. Það vekur auðvitað furðu að ekki skuli hafa náðs samtaða allra þingmanna kjördæmisins um að styðja þingsályktun um að tvöfalda Hellisheið á allra næstu árum og ég get með engu móti skilið afstöðu stjórnarþingmanna að vilja ekki standa að málinu sameiginlega.
Meira um fundinn seinna en nú segi ég góða nótt.
Viðar.
ES. Endilega gefið "Comment" það er mjög gott að fá viðbrögð og skoðanir.

Menntaskóla og fræðasetur í Rangárþing.

2006-02-14T22:49:00.000Z

Komið þið sæl.
Í kvöld verður pistillinn helgaður hugmyndinni um að setja á stofn menntaskóla í Rangárvallasýslu og auka veg framhaldsmenntunar í héraði.
Í nóvenber s.l.hélt Samfylkingarfélag Rang og Vestur Skaft fund, um menntamál í Rangárþingi, að Árhúsum á Hellu. Frummælendur voru rektorar LBHÍ og Bifrastar í Borgarfirði þeir Ágúst Sigurðsson frá Kirkjubæ á Rangárvöllum og Runólfur Ágústsson frá Teigi í Fljótshlíð þá skólastjórar grunnskólanna á Hellu og Hvolsvelli þeir Sigurgeir Guðmundsson og Unnar Þór Böðvarsson ásamt Sveini Runólfssyni Landgræðslustjóra. Síðan var Björgvin G Sigurðsson þingmaður og talsmaður Samfylkingarinnar í menntamálum með ávarp.
Fundarstjórar voru undirritaður ásamt Jóni Ragnari Björnssyni.

Margar góðar hugmyndir voru reyfaðar og ætla ég í þessum pistli að minnast á tvær þeirra. Annarsvegar að stofna menntaskóla Rangæinga og hins vegar að setja á stofn alþjóðlegt fræðasetur í landgræðslu í Gunnarsholti.
Síðarnefnda hugmyndin gengur út á að í Gunnarsholti verði komið á fót aðstöðu til að taka á móti nemendahópum víða að, bæði innanlands og utan, til að fræðast um og stunda rannsóknir á vettvangi landgræðlu og gróðurvarna í víðum skilningi þess orðs. Þarna myndi nýtast vel sú þekking, mannafli og aðstaða sem fyrir er í Gunnarsholti en væri um leið innspýting í þá starfsemi sem fyrir er. Og til að gera hugmyndina að raunveruleika þarf fyrst og fremst samstillt átak opinberra aðila þ.e. ríkis og sveitarfélgs. Aðkoma ríkisins var m.a.hugsuð sem þróunaraðstoð, þar sem nemendum frá þróunarlöndum, þar sem landeyðing er vandamál, væri boðið að koma og fá fræðslu í boði Íslenska ríkisins.

Í því skini að hjálpa til við að koma þessu verkefni í áttina að raunveruleikanum lögðum við fulltrúar Oddaverja fram tillögu um stuðnings ályktun í sveitarstjórn og fengum samþykkta. Í ályktun sveitarstjórnar var skýrt tekið fram sveitarstjórn væri tilbúin að leggja verkefninu fjárhagslegan stuðning og hvatning til ríkisvaldsins að koma að verkefninu. Vonandi verður þetta að veruleika sem fyrst en þá þarf að hamra járnið á öllu vígstöðum.

Fyrrnefnda hugmyndin kom fram hjá Rangæsku Borgarfjarðar rektorunum. Þeir sögðu frá því hvernig hugmynd sem þeir voru upphafsmenn að, var að verða að veruleika í Borgarfirði.
Hugmyndin gekk út á það að stoppa í gat í menntaneti Borfirðinga þar sem framhaldsskólinn er. Fyrir eru í Borgarfirði grunnskólar og háskólar. Þeir kölluðu til fulltrúa frá sveitarfélögum og menntasamfélaginu á svæðinu til að undirbúa málið og staðan í dag er sú að fyrir liggur fullbúin tillaga að menntaskóla Borgarfjarðar á borði menntamálaráðherra. Þetta sama töldu þeir að væri raunhæft að skoða hér í Rangárþingi í ljósi íbúafjölda og þróunar á nemendafjölda í FSU.
Ég held að það ætti að verða eitt af fyrstu verkum nýrra sveitarstjórna á svæðinu eftir næstu kosningar að huga að þessu máli. Hvað aðstöðu og staðarval varðar held ég að við eigum marga kosti sem við þurfum að sjálfsögðu að skoða vel. Í mínum huga er þó einn staður öðrum fremri hvað þetta varðar en það er Laugaland í Holtum.
Menntaskólinn að Laugalandi eða Framhaldskólinn á Laugalandi hljómar það ekki spennandi??
Sæl að sinni, Viðar.

Dagurinn hans Dags.

2006-02-12T20:26:00.000Z

Sæl nú.
Gott blót í gærkvöldi, góður matur, fín skemmtiatriði og rífandi fjör í dansinum. Aðeins hnökrar í nýja dýra hljóðkerfinu en það hlýtur að verða lagað einnig fannst mér óvenju mikil reykjarbræla berast inn í sal sem þyrfti að athuga með lausn á fyrir næsta ár.
DAGUR!!
Dagurinn í dag held ég að komist í sögubækur fyrir þær sakir að Dagur B Eggertsson vann glæsilegan sigur í prófkjöri Samfylkingarinnar í Reykjavík fyrir sveitarstjórnar kosningarnar í vor. Ég held að hér hafi Samfylkingunni auðnast að fá til metorða mann sem á eftir að marka djúp spor í stjórnmálasögu þjóðarinnar næstu árin og jafnvel næstu áratugina ef miðað er við ungan aldur Dags.
Til skemmri tíma litið þýðir þetta hins vegar það að nú er úti um meirihlutadrauma Villa Vill og D-listans í Borginni.
Það mun renna upp fyrir Reykvíkingum þegar þeir bera saman þá kosti sem í boði eru að þeir vilja ekki kjósa yfir sig nú árið 2006 það sem þeir höfnuðu árið 1994. Það mun kristallast fyrir augum kjósenda þegar þeir koma saman í panel Dagur og Villi að þar fara framtíð gegn fortíð og allir sjá hvernig þau úrslit verða.
Annars vorkenni ég Vilhjálmi, sem er að ýmsu leiti mætur maður og ég hef alltaf metið hans stöðu í pólitík þannig að hann sé vinstra megin í Sjálfstæðisflokknum. Og kannski er það þess vegna sem hann fékk framan af ekki það brautargengi innan flokksins sem hann sóttist eftir.
Hann var í raun sniðgengin af Davíðsarminum og komst ekki til metorða meðan sá armur réði lögum og lofum innan flokksins. Allir þekkja þá sögu, Markús Örn, Árni Sigfúss, Inga Jóna og síðan Björn Bjarna öll tekin fram yfir Villa og aldrei gekk rófan. En nú þegar Davíðsöld er úti í Sjálfstæðisflokknum þá er Villi orðinn nógu góður, nægilega miðjusækinn(vinstrisinnaður) til að leiða flokkinn út úr eyðimörkinni.

EN - það er risinn nýr Dagur og því mun Vilhjálmur áfram verða svolítið eins og riddarinn sjónumhryggi don kýkóti, vindmyllur út um allt
en engin völd.

Blessuð blíðan.

2006-02-11T13:34:00.000Z

Veðurguðirnir halda upp á daginn með afmælisbarninu rétt eins og þeir hafi á því sérstaka velþóknun. Alltaf gott að taka á móti blíðunni og ekki síst á Þorra þegar líklegra væri að úti væri frost og fönn.
Var í morgun á Oddaverjafundi þar sem verið var að huga að undirbúningi fyrir sveitarstjórnarkosningar. Ákveðið var að halda opinn fund miðvikudaginn 22. feb. n.k. þar sem ákveðið verði með hvaða hætti boðið verði fram og hvernig aðferð verði viðhöfð við að raða upp á lista.
Hvet ég alla að koma og vera með í að móta stefnuna fyrir sveitarfélagið okkar og ekki síður vil ég hvetja fólk sem hefur áhuga á að bjóða fram krafta sína eða geta bent á aðra sem þeir telja að eigi erindi í framboð.

Ekki veitir af að sem flestir reyni að hafa áhrif á hvernig samfélag við búum okkur og munum við fagna hverjum þeim sem vill leggjast á sveifina með okkur Oddaverjum. Mætið því sem flest á fundinn og hafið áhrif. Fundarstaður verður auglýstur í Búkollu.

Félagar mínir í borginni eru að halda glæsilegt OPIÐ prófkjör nú um helgina og verður spennandi að sjá útkomuna.
Kannski er opið prófkjör sú aðferð sem við ættum að halda Oddaverjar til að velja okkar frambjóðendur??
Meira síðar, sæl að sinni
Viðar.

Byrjun

2006-02-10T23:51:00.000Z

Komið þið sæl.
Á þessari síðu ætla ég að viðra skoðanir mínar um allt milli himins og jarðar sem mér finnst máli skipta. Hér verður fjallað jafnt um innlend málefni sem alþjóðamál ef svo ber undir en mest verður þó líklega rætt um málefni míns ágæta sveitarfélags. Og þar er af nógu að taka.
Meira um það seinna en nú var klukkan var að slá í miðnætti og við tekur nýr sólarhringur, nýr dagur sem er 11. febrúar og þá eiga sumir afmæli og í kvöld er Þorrablót.
Sæl að sinni.
Viðar.